رأيي المتواضع في بيان المجلس مع الأحزاب

أولاً شكل البيان:

• البيان على ورقة بيضاء مطبوعه على الكمبيوتر وليست على أوراق رسمية تخص المجلس مثلاً أو رئاسة الجمهورية أو أي جهه وأعني هنا "Letter head"
• المجلس العسكري لم يوقع على هذا البيان ولا من ينوب عنه ولا أي جهه تمثل السلطة القابضة على حكم مصر حالياً
• هذا البيان غير ملزم لأي طرف لا العسكري ولا حتى الأحزاب الموقعه باعتراف اللي وقعوا النهارده على المحطات المختلفه

ثانياً من ناحية الموضوع:

1. الجدول الزمني لتسليم السلطة: الشعب ينعقد في نصف يناير 2012 الثاني .. ويقوم بمهامه .. أي مهام؟ والاعلان الدستوري يعطي حق التشريع للعسكري وليس لمجلس الشعب ونفس الأمر لتكوين وتشكيل الحكومة. وينعقد الشورى في 24 مارس (مش عارف اشمعنى ده اللي متحدد له يوم) .. المهم .. يجتمع المجلسين في الأسبوع الأخير من مارس .. أو الأسبوع الأول من أبريل .. طيب .. ويختاروا الجمعية التأسيسية في الجلسه دي .. طيب افرض ماقدروش يخلصوا ال100 عضو دول في الجلسه دي؟ .. ياعم ماتحبكهاش كده .. خلاص .. اختارو في اليوم ده وخلصوا وسيبك من موضوع ميثاق الشرف ده علشان زي مانتو عارفين .. أحلى من الشرف مافيش.. قوم ايه .. نط وفط البيان على طول وقال .. الاعلان عن بدء فتح باب الترشح لرئاسة المحروسه مصر .. امتى؟ .. تاني يوم اعلان نتيجة استفتاء الشعب على الدستور .. طيب نقدر نستنتج من هنا تاريخ تقريبي لهذا البدء في فتح الباب .. (مش تسليم السلطة ... لسه) .. من خلال الاطلاع على الاعلان الدستوري في 30 مارس .. وآدي الرابط الرسمي ليه (http://www.egypt.gov.eg/arabic/laws/constitution/default.aspx) .. كالتالي:

* مـــــادة 60 بتقول يجتمع الأعضاء غير المعينين لأول مجلسي شعب وشورى في اجتماع مشترك بدعوة من المجلس الأعلى للقوات المسلحة خلال ستة أشهر من انتخابهم (يعني مش في نفس اليوم بتاع الاجتماع اللي ذكر في البيان .. والبيان غير ملزم .. لكن الاعلان الدستوري ملزم) لانتخاب جمعية تأسيسية من مائة عضو تتولى إعداد مشروع دستور جديد للبلاد في موعد غايته ستة أشهر من تاريخ تشكيلها ويُعرض المشروع ، خلال خمسة عشر يوماً من إعداده على الشعب لاستفتائه في شأنه ويعمل بالدستور من تاريخ إعلان موافقة الشعب عليه في الاستفتاء
 
* يعني .. المجلسين اجتمعوا أول ابريل 2012 .. وبعكس الاعلان الدستوري قرروا يشكلوا في نفس اليوم الجمعية بتاعت الدستور .. (ماشي) .. الجمعية قدامها كام علشان تطلع الدستور؟ حسب الاعلان .. 6 شهور .. يبقى وصلنا امتى؟ أول سبتمبر 2012 .. وعندنا 15 يوم علشان يعرض على الشعب في استفتاء حسب الاعلان برضو .. يبقى وصلنا امتى؟ .. نص سبتمبر .. قول طلعت النتيجة في نفس اليوم (وافرض علشان خاطري انها طلعت بنعم) .. يبقى حسب البيان .. يوم 15 سبتمبر حايعلن عن البدء في فتح باب الترشيح

* طيب .. ماده 28 من الاعلان بتقول .. أول مانعلن عن فتح الباب .. تتولى لجنة قضائية عليا تسمى " لجنة الانتخابات الرئاسية " الإشراف على انتخابات رئيس الجمهورية .. وبعدين .. وتـُشكل لجنة الانتخابات الرئاسية اللجان التي تتولى الإشراف على الاقتراع والفرز .. ثم .. يعرض مشروع القانون المنظم للانتخابات الرئاسية على المحكمة الدستورية العليا قبل إصداره لتقرير مدى مطابقته للدستـور .. ثم .. وتـُصـدر المحكمة الدستورية العليا قرارها فى هذا الشأن خلال خمسة عشر يوماً من تاريخ عرض الأمر عليها .. وعلى افتراض ان القانون طلع صحيح ومش حايرجع تاني يتراجع ويتعدل .. يبقى عندنا مثلاً .. شهر .. وشهر كمان للدعاية الانتخابية .. ده على أقل تقدير يعني .. يبقى معانا شهرين من بدء فتاح الباب .. يبقى وصلنا امتى؟ .. 15 ديسمبر
اعمل بقى الانتخابات .. واعمل اعادة .. وفرز واعلان في الحالتين .. بينهم 15 يوم على الأقل زي في أي انتخابات .. يبقى وصلنا كام .. 1 يناير 2013 .. اللهم صلي على النبي ... وده كله على أقل تقدير .. وأفضل ظروف

* يبقى المجلس حكم مصر أد ايه؟ ... من 11 فبراير 2011 الى 1 يناير 2013 .. سنتين الا شهر .. بسم الله ماشاء الله .. يعني مش 6 شهور زي ماحلف يومها بالطلاق

2. تعديل الماده الخامسه .. بتاعت ترشح الأحزاب على الفردي .. ودي اللي الأحزاب كانت حاتبيض علشانها .. وافق عليها المجلس اللي مش موقع على البيان .. وحايخليهم يترشحوا على الفردي .. ومش حاتكلم على النقطة دي كتير .. لأن زي ماقلت كانت دي حرب الأحزاب الرئيسية .. ودي اللقمة اللي المجلس خدها منهم وبعدين سبهالهم .. فدي مش نعمه يعني

3. دراســـــــــــــــــة .. لاحظ انها مجرد دراسة .. في بيان غير ملزم .. والمجلس مش موقع عليه .. وممكن يلحس كلامه بكره .. زي ماعمل في موضوع دستور 71 .. ماشي .. دراسة وقف العمل بقانون الطوارئ .. وممكن الدراسة تطلع وتقول ماينفعش .. لازم طوارئ .. وكمان ايه .. إلا .. هوه بعد ده كله فيه إلا .. إلا في بعض الجرائم .. وبعض دي موال لوحده .. وانتو فاهمين بقى .. وفي نفس البند .. دراسة .. تاني .. دراسة اصدار تشريع بحرمان بعض .. تاني .. بعض .. قيادات .. (قيادات خللي بالك) الحزب الوطني المنحل عن مباشرة الحقوق السياسية .. وينطبق هنا برضو نفس الكلام اللي قلناه عن الطوارئ

4. عدم احالة المدنيين للمحاكم العسكرية .. إلا .. (للمره العشرين إلا) .. في الجرائم المنصوص عليها في قانون القضاء العسكري .. طيب ماهو القانون ده متعدل من أيام مبارك .. وفتحله الباب يحاكم المدنيين زي ماهو عايز .. يبقى عملنا ايه

5 و 6 .. كلام مش مهم نعلق عليه

7. آه .. سمح للمنظمات المدنية المحلية والأجنبية .. بإيه؟ .. مشاهدة ومتابعة .. مش مراقبة .. الانتخابات .. مش رقابه وكلام من ده .. يعني زي ماحضرتك كده شاهدت وتابعت مباراة الزمالك والحرس النهارده .. كنت تقدر حضرتك تقول وتعلن ان ضربة الجزاء دي كانت صح ولا غلط؟ .. طبعاً تقدر بس على مراتك .. كمان خد دي .. طبقاً لما تقرره اللجنة القضائيه العليا للإنتخابات .. يعني لو هيه قررت ان المنظمات دي تقعد على قهوه ظاظا على أول الشارع وماتدخلش اللجان .. يبقى حقها .. وتشاهد بقى وتابع .. رص الشيشه السلوم والقص

8. بتتكلم عن موضوع الشرف اللي مافيش أحسن منه

الخاتمه مهمه قوي بقى .. الأحزاب دي .. بتقر وتعترف بتأييد المجلس العسكري وتقدير كل التقدير للدور الذي يقوم به من أجل حماية الثوره .. الخ الخ .. وهنيالك يامكسور العين

والله الموفق